images                                   DS1                                       IMG 02

 

 

ПРОМОЦИЈА НА „БАЛКАНСКАТА САГА“ НА ЛУАН СТАРОВА

На 24 декември 2015 г., во 12 часот, во Друштвото на писателите на Македонија ќе биде промовиран циклусот романи „Балканска сага“ од Луан Старова во 10 тома.  За делата на Луан Старова ќе зборуваат писателите Ристо Лазаров и Ермис Лафазановски, а делови од прозата ќе чита Александра Велинова.

Luan Starova

Циклусот „Балканска сага“ на 3000 страници на читателите им ги доближува најзначајните романескни остварувања на Луан Старова: „Татковите книги“, „Времето на козите“, „Балкански клуч“, „Атеистички музеј“, „Патот на јагулите“, „Ервехе“, „Тврдина од пепел“, „Љубовта на генералот“, „Амбасади“ и „Потрага по Елен Лејбовиц“. Уредник на едицијата е Веле Смилевски, а автори на толкувачките текстови на делата на Старова се познати имиња од македонската и светската книжевна сцена, меѓу кои: Матеја Матевски, Едгар Морен, Георги Старделов, Леон Сомвил, Гане Тодоровски, Катица Ќулавкова, Ристо Лазаров, Предраг Матвеевиќ, Морис Друон, Јелена Лужинаи Елизабета Шелева.

Циклусот „Балканска сага“ во 10 тома е критичко и дополнето издание на романите на Луан Старова кои сега, во издание на „Дијалог“, за прв пат се појавуваат во интегрален вид под заеднички наслов. Делата презентирани во оваа едиција со успех се објавувани на дваесетина јазици во светот. Во Македонија романите на Луан Старова се наградени со врвни книжевни признанија, меѓу кои: наградата „Стале Попов“ на Друштвото на писателите на Македонија за најдобра прозна книга, „Рациново признание“,„Климент Охридски“, „Велја кутија“ и Роман на годината на „Утрински весник“.